ھەڵبژاردن...ئێوەش دەچنە بەغداد بەڵام ھیچتان پێناكرێت
خالد ڕەنجدەر
زۆرن ئەو بەڵێنانەی كە كاندیدەكانی ئەمجارەی كورد داویانە بە میللەت. لەوانە: كاركردن بۆ جێبەجێكردنی ماددەی 140ی تایبەت بە كەركوك و ناوچە دابڕاوەكانی دیكەی كوردستان...ئیدانە كردن و بەرەنگاربوونەوەی تیرۆری دژ بە خەڵكی مەدەنی و ڕاپێچكردنی بەرپرسیاران لێی بۆ بەردەم دادگا...دانانی‌ سنورێك بۆ ده‌زگا سیخوڕیه‌كانی‌ بێگانه‌ كه‌ چالاكی‌ له‌ عێراقدا دەكەن...لە بەغدادەوە ھەرێمی كوردستان چاك دەكەین. گەلێك بەڵێنی دیكەش.
بەكارھێنانی ماددەی 140ی تایبەت بە كەركوك و ناوچە دابڕاوەكان لە بانگەشەی ھەڵبژاردندا، چەواشەكارییە و، بە ڕای من ئەو "جەمع و تەرح"یە كە نزار قەبانی بۆ منداڵانی غەززەی باس دەكات و دەڵێ: (إضربوا إضربوا بكل قواكم واحزموا أمركم ولا تسألونا...نحن أهل الحساب والجمع والطرح فخوضوا حروبكم واتركونا). لێدەن، بە ھەموو ھێزی خۆتان لێدەن و خاوەنی بڕیاری خۆتان بن و لە ئێمە مەپرسن...ئێمە ئەو خەڵكەین كە خەریكی حیساب و جەمع و تەرحی خۆمانین، ئێوە جەنگی خۆتان بكەن و واز لە ئێمە بێنن.
منیش بە خەڵكی كەركوك و ناوچە دابڕاوەكان دەڵێم: بڕۆن خۆتان خەباتی ڕزگار بوونی خۆتان بكەن و، ناوچەكانی خۆتان دەست بخەنەوە و، بە تەمای ئەم كاندیدانە مەبن. ئەوانە خەریكی جەمع و تەرحی پارە و كورسی خۆیانن و، كێشەكەی ئێوەشیان كردۆتە گۆرانی و ئاوازی گەیشتن بە ئامانجە سیاسییەكانی خۆیان. ھەر كەسێكیش بۆ گێڕانەوەی كەركوك و ناوچە دابڕاوەكان ھیوای بە كاندیدەكانی كوردە با ئەو ھۆنراوەی ئەحمەد مەتەر بخوێنێتەوە كە دەڵێ: (هرم الناس و كانوا يرضعون عندما قال المغني عائدون، يا فلسطين ومــازال المغني يغني وملايين اللـحون فـي فضاء الجرح تفنى، واليتامى من يتامى يولدون...). ئەو خەڵكە پیرانەی ھەن كاتی خۆی كۆرپە بوون كە گۆرانی بێژەكە دەیچڕاند: دەگەڕێینەوە...ئەی فەلەستین تا ئێستاش ئەو گۆرانی بێژە ھەمان گۆرانی دەچڕێت و بە ملیۆناھە ئاوازیش لە ئاسمانی زامدا وون دەبن و، ھەتیو لە ھەتیو لە دایك دەبن.
گۆرانی بێژەكەی ئێمەی كوردیش لە بیستەكانی سەدەی ڕابووردوە تا ئەمڕۆ گورانی دڵی كوردستان و قودسی كوردستان و گەڕانەوەی كەركوك ئەدەن بە گوێماندا و، نەوە لە دوای نەوە بەو ئاوازە ھەڵدەپەڕێنن. ئەوەی كە ئاوازی ئەمڕۆش لە دوێنێ جیا دەكاتەوە پەیوەست بوونی ئیسلامییەكانی كوردستانە بەو تیپەوە.
ئیدانە كردن و بەرەنگاربوونەوەی (ئیرھاب) بەڵێنێكە لایەنێكی ئیسلامی كورد داوویەتی بە دەنگدەرانی كورد و، ئەگەر چووە پەرلەمانی عێراق لەوێش وەك پەرلەمانی كوردستان دەبێتە قەڵەمی داڕشتنی یاسای دژە تیرۆر. عەلمانییەكانی كورد بەڵێنی وایان نەداوە بە دەنگدەران. ئێوە كە ئەمە بەرنامەی بانگەشەی ھەڵبژاردنتان بێت بەسە بۆ ئەوەی لایەك لە خەڵكی عێراق دەنگتان پێ بدات. خەمی دەرچوونیشتان نەبێت.
سنوور دانان بۆ دەزگا سیخورییە بێگانەكان لە كوردستانیشەوە دەكرێت. باشە بۆچی چاوتان ئەو بنكە و بارەگایانە نابینێت كە ئەو دەزگا سیخوڕییانە لە كوردستان ھەیانە و، دەبێت لە پەرلەمانی بەغدادەوە بیبینن؟‎ باشە كێ لە ئەمریكا و ئێران و توركیا زیاتر لە عێراقدا ژێرزەمینانە كار دەكات؟ بڕوا ناكەم وەڵامتان ھێندە دیبلۆماسیانە بێت كە بڵێن "نازانین".
لە بەغدادەوە ھەرێمی كوردستان چاك دەكەین. پرۆسەیەكی زۆر جوان و لە جێی خۆیدایە، بەڵام زۆر سەیرە، ئێوە ساڵەھای ساڵە لە كوردستانەكەی خۆتاندا كار دەكەن و، بە چاوی خۆتان گەندەڵی دەبینن و بۆتان چارەسەر نەكراوە، كەچی پێتان وایە لە بەغدادەوە بۆتان چارەسەر دەكرێت. باوكم زۆرجار كە ھێنانەدی ئامانجێكی بەلاوە ئەستەم بوایە دەیووت: من بەو دوعایە ناڵێم ئامین. بەڕاستی منیش باوكم ئاسایی بەو بەڵێنەی ئێوە ناڵێم "ئامین" و، شینەكەشتان بۆ ھەریسەكەیە نەك بۆ حوسەین.
لە كۆتاییدا ئەوە بە بیر كاندیدە ئیسلامییەكانی كوردستان دێنمەوە كە لە سوێندی بەرلەمانی عێراقدا ھاتووە "سوێند بە خاكی عێراق". ھەر خۆتان دەكەم بە شاھید بە سەر خۆتانەوە لە ڕۆژی قیامەتدا. پێم ناڵێن ئەمە كەی سوێندی ئیسلامییە و، چۆن لە گەڵ ئەو عەقیدەیەدا دەیگونجێنن كە ساڵەھای ساڵە بە گوێی ئێمەوماناندا دەیخوێنن؟